နှစ်ဆင့်ထိုးနည်းနှင့် လက်လှည့်ထိုးနည်း

By Ko Soe Gyi

နှစ်ဆင့်ထိုးနည်း

– လက်သီးကို ပျော့ပျော့လေးထိုးဟန်ပြပြီး ရန်သူရဲ့ ကိုယ်လုံး (သို့) မျက်နှာနှင့် လက်သီးထိတွေ့ချိန်မှာ ပခုံးအားရယ်၊ ခါးအားရယ် တစ်ပြိုင်တည်း စုစည်းအသုံးပြုပြီး ဆင့်တွတ် ထိုးလိုက်ရတဲ့ ထိုးနည်းဖြစ်ပါတယ်။ ဒီထိုးနည်းက အတွင်းဒဏ်ဖြစ်အောင် အားထည့်ထိုးလို့ရသလို ညင်ညင်သာသာနှင့် အထိုးခံရသူ လွင့်စဉ်သွားအောင် ဟန်ပြထိုး လို့လဲရပါတယ်။

လက်လှည့်ထိုးနည်း

– လက်လှည့်ထိုးနည်းကို ဝက်အူရစ်လက်သီးထိုးနည်းလို့လဲ ခေါ်ကြပါတယ်။ ဒီထိုးနည်းဟာလဲ နှစ်ဆင့်ထိုးနည်းလို ရိုးရိုးလေးပါပဲ။ လက်သီးနဲ့ မိမိထိုးမယ့် ဆုံချက်ထိတွေ့ချိန် လက်သီးကို မှောက်လျက်ကနေ ပက်လက်အဖြစ် ပြောင်းလဲပြီး မွှေ့ထိုးရတဲ့နည်းပါ။ ဒီထိုးနည်းဟာ လူ့ခန္ဓာကိုယ်ရဲ့ အဆီလွှာနှင့် ပြင်ပအသားလွှာကို ခွဲခြမ်းလိုက်တဲ့နည်းဖြစ်တာကြောင့် တစ်ဖက်ရန်သူကို မိမိသုံးတဲ့ အားပေါ်မူတည်ပြီး အတွင်းဒဏ်ရစေ၊ သေစေနိုင်သော ထိုးနည်းတစ်ခုပါ။ လက်လှည့်ထိုးနည်းနဲ့ တိုက်ခိုက်တဲ့အခါမှာ အရှိုက်နဲ့ ဆီးအိမ်တို့ကို အဓိကတိုက်ခိုက်ရပါတယ်။

The Conton Corkscrew

၀က်အူလက်သီး ထိုးပုံထိုးနည်း

– အခု ကျွန်တော်တင်ပြထားတဲ့ နှစ်ဆင့်ထိုးနည်းနှင့် လက်လှည့်ထိုးနည်းနှစ်မျိုးဟာ အပြင်ပန်းကြည့်ရုံနဲ့တင် မှတ်သားရလွယ်သော ရိုးရှင်းသော လက်သီးထိုးနည်းစနစ်များဖြစ်ပါတယ်။ သို့သော် ရိုးရှင်းလွန်းလို့ ဒီနည်းစနစ်နှစ်မျိုးကို တတ်မြောက်ရန် လွယ်ကူမည်ဟု မထင်ပါနဲ့ မိတ်ဆွေ။ မှားသွားပါလိမ့်မည်။ အကြိမ်ကြိမ်အထပ်ထပ် လေ့ကျင့်မှသာ ကျင်လည်စွာ အသုံးချနိုင်မယ့် နည်းများပါ။ အကျိုးထိရောက်မှုကလဲ အလွန်တာသွားလှပါတယ်။

– ဒီထိုးနည်းစနစ်နှစ်မျိုးကို လေ့ကျင့်မည်ဆိုလျှင် အရင်ကကျွန်တော်တင်ထားတဲ့ လျှပ်စစ်လက်သီး လေ့ကျင့်နည်း မှာကဲ့သို့ပင် အဝတ်စ (သို့) မျက်နှာသုတ်ပဝါ အသေးတစ်ခုနှင့် စတင်လေ့ကျင့်ပါ။ တစ်လလောက် လေ့ကျင့်ပြီးမှ သဲအိတ် (သို့) အမာစားများနှင့် လေ့ကျင့်ပါ။ ဒီနေရာမှာ လက်လှည့်ထိုးနည်း အကြောင်း မှတ်သားမိသလောက် ပြောပြပါရစေ။

လက်လှည့်ထိုးနည်း ကို ဝက်အူရစ်လက်သီးထိုးနည်း လို့လဲခေါ်ပါတယ်၊ ဒီထိုးနည်းစနစ်ကို မိတ်ဆွေတို့အတော်များများ အမြင်မစိမ်းကြပါဘူး။ လွန်ခဲ့သောနှစ်တွေက နာမည်ကျော် ကွန်ဖူးမင်းသား Jet Li ရဲ့ Fearless ဆိုတဲ့ ဇာတ်လမ်းမှာ ဒီလက်သီးထိုးနည်း ပါဝင်ပါတယ်။ အောက်ပါ link များမှာသွားရောက်ကြည့်ရှုနိုင်ပါတယ်…

http://www.youtube.com/watch?v=EiJwGhTxzqI
http://www.youtube.com/watch?v=ALk7qG3VqjQ

– ဒီနည်းကို ကျွန်တော်တို့ မြန်မာအခေါ် လက်လှည့်ထိုးနည်း တရုတ်တွေက ကောင်းတုံ ဝက်အူရစ် လက်သီးထိုးနည်း၊ နောက်… ငယ်စဉ်က ဖတ်မှတ်ဖူးခဲ့တဲ့ ဆရာရာဇဂဏီ ရဲ့ လူသူတော်သျှောင်တစ်စောင်း ဝတ္ထုတွေမှာ အိန္ဒိယအခေါ် ဗာရာဏသီလက်သီးထိုးနည်း စသည်ဖြင့် အမျိုးမျိုးမှတ်သားမိပါတယ်။ လူမျိုးနဲ့အရပ်ဒေသကိုလိုက်ပြီး ကွဲပြားမှုတွေတော့ အနည်းငယ်ရှိကြတာပါပဲ။ သို့ပေမယ့် အကျိုးသက်ရောက်မှုကတော့ အတူတူလောက်ပါပဲ။ ဒီနည်းစနစ်ကို ကျွန်တော်မှတ်သားဖူးတဲ့ ဆရာရာဇဂဏီ ရေးသားခဲ့တဲ့ ဗာရာဏသီလက်သီးထိုးနည်း ဆိုတဲ့ လက်လှည့်ထိုးနည်းကျင့်ပုံလေးကို သုတအဖြစ် တင်ပြပေးလိုက်ပါတယ်။ အခုဖော်ပြမယ့် ဆရာရာဇဂဏီ ရေးသားခဲ့တဲ့ နည်းစနစ်နဲ့ ကျွန်တော်လေ့ကျင့်စဉ်ကကျင့်နည်းနဲ့ ကွဲလွဲမှုရှိပါတယ်။

– ကျွန်တော်သင်ကြားရစဉ်က မျက်နှာသုတ်ပုဝါအသေးတစ်ခုနှင့် တစ်လတိတိ လေ့ကျင့်ခဲ့ရပြီး တစ်လပြည့်တဲ့အခါ သဲအိတ်ရယ်၊ နောက်… ထောင်ထားတဲ့ပျဉ်ပြားမှာ ဖီးဆင့်စက်ဘီးနောက်ကယ်ရီယာခုံကို တပ်ထားပြီး အထိုးကျင့်ခဲ့ရတာပါ။ ဒီနည်းစနစ်က ကျွန်တော့်အတွေ့အကြုံအရပြောရရင် သဲအိတ်ထိုးတာထက်၊ ပျဉ်ပြားမှာ စက်ဘီးနောက်ခုံတပ်ပြီး ထိုးတာက ပိုအဆင်ပြေပါတယ်။ အောက်မှာ ဆရာရာဇဂဏီ ရေးသားခဲ့တဲ့ နည်းစနစ်ကို ရေးသားထားပါတယ်။

ဗာရာဏသီလက်သီးထိုးကျင့်နည်း

– နေ့စဉ်  နံနက်စောစောထပြီး လက်သီးထိုးမကျင့်မီ  မြင်းထိုင်ပုံစံထိုင်ပြီး  အသက်ရှူခြင်းကို ဖြေးဖြေးနဲ့ပြင်းပြင်း အကြိမ်ကိုးဆယ် ပြုလုပ်ရပါမယ်။

– ပိတ်ပါး (သို့) မျက်နှာသုတ်ပုဝါ အသေးတစ်ခုကို ထောင့်များတွင် အပေါ်အောက်ကြိုးနှင့်ဆွဲပြီး လက်သီးထိုးကျင့်ရန်အတွက် ပြုလုပ်ထားရပါမယ်။

– မြင်းထိုင်ပုံစံဖြင့် အသက်ရှူရှိုက်ခြင်းပြုလုပ်ပြီးတာနဲ့ လက်သီးထိုးနည်း ကျင့်ရပါမယ်။ ချိတ်ဆွဲထားတဲ့ ပိတ်ပါးနဲ့မိမိ လက်နှစ်တောင်လောက်အကွာမှာရပ်ပြီး လက်လှည့်ထိုးနည်းနဲ့ ထိုးရပါမယ်။ ဗာရာဏသီအခေါ် “စောင်းဘရူး” လို့ ခေါ်ပါတယ်။

– လက်တစ်ဖက်ကို အကြိမ်ငါးဆယ်စီ ထိုးကျင့်ရပါမယ်။ အကြိမ်ငါးဆယ်ထက် ပို၍ မထိုးပါနှင့်ဟု မှတ်သားရပါတယ်။ ဤကဲ့သို့ လက်သီးထိုးကျင့်ပြီးလျှင်ပြီးချင်း ရေအေးအေးတစ်ခွက်ကို အမြဲသောက်ရမည်။ ညအိပ်ရာဝင်ခါနီးတိုင်း လက်သီးနှစ်လုံးကို နနွင်းစစ်စစ်နဲ့ လိမ်းကျံပြီးအိပ်ရမည်။ ညတိုင်းနို့တစ်မျိုးမျိုး သောက်နိုင်လျှင် ပိုကောင်းသည်ဟု မှတ်သားရပါတယ်။ ပိတ်ပါးစနှင့် ထိုးကျင့်ခြင်းကို တစ်ပတ်တိတိ လုပ်ဆောင်ရပါမည်။

– ပိတ်ပါးစနှင့် တစ်ပတ်ထိုးကျင့်ပြီးလျှင်၊ ဒုတိယအပတ်မှာ အဆင့်တက်ရပါမည်။ သံပြား (သို့) သွပ်ပြားပါး ခြောက်လက်မပတ်လည်လောက်ကို လေးလက်မပတ်လည် (သို့) ခြောက်မပတ်လည်ရှိတဲ့ တိုင်မှာ ကိုယ့်ရဲ့ရင်ခေါင်းတည့်တည့်မှာထားပြီး ညာတစ်လှည့်၊ ဘယ်တစ်လှည့်စီ ထိုးရပါတယ်။ ပထမငါးချက်မှာ ခပ်ဖြည်းဖြည်းထိုး၊ ဒုတိယငါးချက်မှာ ချင့်ချိန်ပြီး အားထည့်၍ ခပ်ပြင်းပြင်းထိုး၊ တစ်ခါထိုးရင် ဆယ်ကြိမ်ထက် မပိုစေပဲ၊ ဆယ်ကြိမ်ထိုးပြီးရင် ခဏနား၊ ထပ်ထိုးနဲ့ တစ်နေ့ကို အကြိမ်ငါးဆယ်စီ ထိုးရပါမယ်။ အကြိမ်ငါးဆယ်မှာ နောက်ဆုံး လေးဆယ့်ကိုးချက်မြောက်နဲ့ ငါးဆယ်မြောက်တွင်တော့ အားကုန်နှစ်ပြီး ထိုးရမည်။ ဒီထိုးနည်းကို အနည်းဆုံးခြောက်လတိတိ လေ့ကျင့်ရမည်ဟု ရေးသားထားတာကို မှတ်သားရပါတယ်။

– ယခုဖော်ပြခဲ့တဲ့နည်းကို မိတ်ဆွေတို့အတွက် လေ့လာမှတ်သားမိသမျှ တင်ပြလိုက် ပါတယ်။ လေ့ကျင့်မည်ဆိုလျှင် မိမိနဲ့အဆင်ပြေသလို လေ့ကျင့်နိုင်ပါတယ်။ ကျွန်တော်က လက်သီးထိုးနည်းများနှင့် ခြေကန်နည်းစနစ်များကို အထူးဝါသနာထုံတာကြောင့် လက်လှမ်းမီသမျှ လေ့လာမှတ်သား လေ့ကျင့်ဖြစ်ခဲ့ပါတယ်။ ယခုတင်ပြတဲ့ လက်သီးထိုးနည်းစနစ်နှစ်ခုဟာ နှစ်သက်မိတဲ့ လက်သီးထိုးနည်းစနစ်များမှာ အပါအဝင်ဖြစ်ပါတယ်။ ဒီထဲက လက်လှည့်ထိုးနည်းကို ဆရာဦးစင်ချိုင် ရဲ့ မိုးကြိုးလက်သီးဆယ့်ခြောက်ချက် မှာလည်းပါဝင်တာကို လွန်ခဲ့တဲ့နှစ်တွေက မှတ်သားခဲ့ရပါတယ်။ နောက်များမှ အလျဉ်းသင့်သလို တင်ပြပါဦးမယ်ခင်ဗျာ။

Download– အထက်ပါ နှစ်ဆင့်ထိုးနည်းနှင့် လက်လှည့်ထိုးနည်းများကို သိမ်းထားလိုသူများအတွက် ဒီနေရာ မှာ Download ဆွဲနိုင်ပါတယ်။

– ရွှင်လန်းချမ်းမြေ့ကြပါစေ။

မှတ်ချက်။ ။ ယခုဆောင်းပါးတွင် အသုံးပြုထားသောပုံသည် ဆရာကြီး ဦးပြည်သိမ်း ဘာသာပြန်ခဲ့သော လျှို့ဝှက်သော ကမ္ဘာ့သတ်ပုတ်နည်းများ စာအုပ်မှ ဖြစ်ပါသည်။

ဆရာကြီးဗန်းမော်သိန်းအောင် ၏ လျှပ်စစ်လက်သီးထိုးနည်း

By Ko Soe Gyi

ဗန်းမော်လက်သီးထိုးနည်း မှာ မြန်မာ့ဂုဏ်ရောင်သိုင်းအဖွဲ့ဦးစီးဆရာကြီး ဗန်းမော်သိန်းအောင် ၏ လက်သီးထိုးနည်းစနစ် (သို့) လက်သီးသိုင်းကွက် (သို့) လက်သီးပညာကို ပြောလိုရင်းဖြစ်ပါသည်။ ဆရာကြီးဗန်းမော်သိန်းအောင်၏ လက်သိုင်းပညာ (သို့) လက်သီးထိုးနည်းစနစ်တွင် လက်သီးမာ နှင့် လက်သီးပျော့ ဟူ၍ နည်းစနစ်နှစ်မျိုးရှိပါသည်။ လက်သီးပျော့ကို လျှပ်စစ်လက်သီး (သို့) စပရိန်လက်သီး ဟုလည်းခေါ်ပါသည်။ စပရိန်လိုတွန်းကန်ထွက်သွားပြီး လျှပ်စစ်လက် သလိုမြန်သောကြောင့် ဤသို့အမည်ပေးဟန်ရှိပါသည်။ လက်သီးပျော့ထိုးနည်း တွင် လက်ဝါး ကို ဖြန့်လျက်ထောင်ထားပြီး ရန်သူ့မျက်နှာ (သို့) ထိုးရန်ပစ်မှတ်နေရာနှင့် နှစ်ပေခန့်အကွာအဝေးတွင် ချိန်ဆထားပြီး လက်သီးကို ထိုးထုတ်လိုက်သည်နှင့် (ပစ်မှတ်ကိုထိခါနီးတွင်) လက်သီးကို ဆုပ်လိုက်ရပြီး ဖျတ်ခနဲထိုး၍ ဖျတ်ခနဲပြန်ုဆုတ်ရသောနည်းဖြစ်သည်။ လက်သီးမာထိုးနည်း မှာ လက်သီးကိုမထိုးမီ အသင့်ပြင်ချိန်ဆကတည်းက လက်သီးကို ဆုပ်၍ထားရသည်။ လက်သီးကို ခါးနေရာ (သို့) ရင်ဘတ်ရှေ့နေရာမှ ထိုးထုတ်သောနည်းဖြစ်သည်။ လက်သီးကို ထိုးပြီး ပြန်ဆုတ်ရန် မလိုပဲ အားကုန်ဆန့်ထိုးထုတ်လိုက်ခြင်းဖြစ်သည်။ ပြီးမှ ရင်ဘတ်ရှေ့တွင် ပြန်၍အသင်ပြင့်ရန်လိုသည်။ လက်သီးမာကို လက်သီးပျော့ကဲ့သို့ထိုးလိုလျှင် လက်သီးကို ဆုပ်လျက်မှ မိမိ၏ မေးစေ့ရှေ့ခန့် တွင်ထောင်ထားပြီး ဖျတ်ခနဲထိုးထုတ်၍ ဖျတ်ခနဲပြန်၍ အသင့်ပြင်ခြင်းဖြစ်ပါသည်။ ဝင်ချွန်းကွန်ဖူး ပညာမှ လက်မကွာလက်သီး စနစ်နှင့် ဆင်သည်။ သို့သော် လက်မကွာလက်သီး ထိုးနည်းစနစ်က လက်သီးဆုပ်၍ ဒေါင်လိုက်ထောင်ထားရာမှ ဆတ်ခနဲထိုးထုတ်လိုက်သောနည်း စနစ်ဖြစ်သည်။ စပရိန်လက် (သို့) လျှပ်စစ်လက်သီး ကတော့ လက်ဝါးကိုဖြန့်ထောင်ထားရာမှ ဆတ်ခနဲလက်ကို ရှေ့သို့ထုတ်လိုက်ချိန်တွင် လက်သီးကိုဆုပ်လိုက်ရသောနည်းစနစ်ဖြစ်ပါသည်။

လျှပ်စစ်လက်သီးအသုံးချလေ့ကျင့်စဉ်

လက်သီးထိုးလေ့ကျင့်မည့်သူသည် ရှစ်လက်မပတ်လည်ခန့်ရှိ ပလတ်စတစ်ပြားတစ်ချပ် (သို့မဟုတ်) [S.P အိတ်ခေါ်သောပလတ်စတစ်အိတ် အကြည်တစ်လုံးရလျှင်လည်းဖြစ်ပါသည်။] ကို မိမိ မျက်နှာခန့်အမြင့်တွင် ကြိုးသေးသေးဖြင့် ချိတ်ဆွဲထားပါ။ ပလတ်စတစ်ပြား (သို့) ပလတ်စတစ် အပေါ်ထောင့်တစ်ဖက်တစ်ချက်စီတွင် ကြိုးဖြင့် ချိတ်ဆွဲခြင်းဖြင့် လက်သီးဖြင့်ထိုးလိုက်၍ ပလတ်စတစ်ပြားကိုထိလျှင် ရှေ့ဘက်သို့သာရွေ့သွား၊ လွင့်သွားပြီး လည်မသွားပေ။ လည်နေလျှင် လက်သီးထိုးရခက်ပါသည်။ ပလတ်စတစ်ပြားသည် မိမိ၏ မျက်နှာတည့်တည့် (၁၈-လက်မခန့်) အကွာတွင် ရှိရမည်။ မိမိ လက်တံရှည်လျှင် (၂၄-လက်မခန့်) အကွာတွင်ရှိရမည်။ မိမိ လက်သီးကိုဆုပ်ပြီး လက်ဆန့်ထိုးလိုက်လျှင် ပလတ်စတစ်ပြားကိုထိသည့် အကွာအဝေးအနေအထား သည် အကောင်းဆုံးဖြစ်သည်။ ပလတ်စတစ်ပြားမရလျှင် ချွေးသုတ်မျက်နှာသုတ်ပုဝါ အသေးနှင့်လည်း ချိတ်ဆွဲ၍ ကျင့်လျှင်လည်းရသည်။

၁။ မိမိရှေ့တွင် ပလတ်စတစ်ပြား (သို့) မျက်နှာသုတ်ပုဝါအသေးကို ချိတ်ဆွဲထားပါ။

၂။ လက်သီးထိုးမည့်သူသည် ပလတ်စတစ်ပြားကိုမျက်နှာမူ၍ ဘယ်ခြေရှေ့ညာခြေနောက်တွင် ထားလျက် (၂)ကွက် ဒေါင်လိုက်အနေအထားဖြင့်နေပါ။ လက်နှစ်ဖက်ကို တံတောင်ကွေး လျက် ထောင်ထားပါ။ လက်ဝါးနှစ်ဖက်ကို ဖြန့်ထားပါ၊ ဘယ်လက်ကို ရှေ့တွင်ထား၍ ညာလက်ကို နောက်တွင်ထားပါ။ (ဥပမာ- အင်္ဂလိပ်လက်ဝှေ့ (boxing) တွင် အသင့်ပြင်ထားသည့် ပုံမျိုးဖြစ်သည်) လက်ချောင်းလေးချောင်းကို စိထား၍ လက်မကို (၉၀)ဒီဂရီ အနေအထားဖြင့် ကားထောင်ထားပါ။ တစ်ကိုယ်လုံးရှိ အကြောများကို ဖြေလျှော့ထားပါ။ စိတ်ကိုလည်း ပေါ့ပါး လွတ်လပ်နေပါစေ။

၃။ ညာလက်သီး (ထောင်ထားသောလက်ချောင်း) များကို ပလတ်စတစ်ပြားရှိရာသို့ ဖျတ်ခနဲဆန့်ထုတ် လိုက်ပါ။ ပလတ်စတစ်ပြားနှင့်ထိခါနီးတွင် လက်သီးကိုဆုပ်လိုက်ပါ။ (လက်ချောင်းလေးများကို လက်ဝါးဖြင့်ထိခတ်ပြီး ဆုပ်လိုက်ရမည်။) လက်သီးထိုးထုတ်လိုက်သည့်အခါတွင် ခါးကိုပါလိမ်ပေးပါ။

၄။ ပလတ်စတစ်ပြားကို လက်သီးက ဖျတ်ခနဲထိလိုက်သည်နှင့် ထိုးထားသော ညာလက်သီးကို အမြန်ဆုံးပြန်ရုပ်လိုက်ပါ။ လက်သီးထိုးချက်မြန်လျှင် လက်သီးကိုပြန်ဖြေရန် (သို့) လက်ဝါးဖြန့်ရန် အချိန်ပင်မရလိုက်ပဲ လက်သီးဆုပ်လျက်ဖြင့် ပြန်ရုပ်ပြီးရှိနေလိမ့်မည်။ နောက်တစ်ကြိမ် ထိုးရန်အတွက် ညာလက်ဝါးကို ပြန်ဖြန့်လိုက်ရမည်။ (ပလတ်စတစ်ပြားကို ထိအောင်ထိုးရမည်။ မထိပဲ လက်ပြန်မရုပ်ရ ပါ။ အကျင့်ဖြစ်ပြီး ပစ်မှတ်ကို မထိပဲ နေလိမ့်မည်) ထိုသို့အသင့်ဖြစ်သည်နှင့် ဆက်လေ့ကျင့်ပါ။

၅။ ထိုသို့ ညာလက်သီးထိုးလေ့ကျင့်ပြီးလျှင် ညာခြေရှေ့၊ ဘယ်ခြေနောက်ထားလျှက် (၂)ကွက် ဒေါင်လိုက်ဖြင့် ညာခြေခင်းပြီး ဘယ်လက်သီးထိုး လေ့ကျင့်ရပေမည်။ ညာလက်ရော၊ ဘယ်လက်ရော နှစ်ဖက်စလုံး ထိုးတတ်ရပေမည်။

၆။ ထိုသို့ ဘယ်ခြေခင်း၍ ညာလက်သီးထိုးလေ့ကျင့်ခြင်း၊ ညာခြေခင်း၍ ဘယ်လက်သီး ထိုးလေ့ကျင့်ခြင်း ကျင့်သားအတော်ရလာလျှင်ခြေနှစ်ဖက်ကို (၂၇)လက်မခန့် ခွဲရပ်ပြီး (၂)ကွက်ကန့်လန့်ခြေအနေအထားမှနေ၍ ညာလက်သီးထိုးလေ့ကျင့်ခြင်းကို အကြိမ်များစွာနေ့စဉ် ရက်ဆက်လေ့ကျင့်ရပေမည်။

၇။ ထိုသို့ (၂)ကွက် ကန့်လန့်အနေအထားမှနေ၍ ညာလက်လေ့ကျင့်၍ ကျင့်သားအတော်ရလာလျှင် ဘယ်လက်သီးထိုးကိုလေ့ကျင့်ရပေမည်။ ထိုသို့အနေအထား အမျိုးမျိုးဖြင့် လေ့ကျင့်ထားလျှင် မည်သည့်အနေအထားမှဖြစ်စေ လျှပ်စစ်လက်သီးကို လျှပ်စစ်လက်သလို အလွန်လျင်မြန်စွာ ထိုးနိုင်လာလိမ့်မည်။ လက်တွေ့ကျင့်ကြည့်လိုက်ပါ။ ရက်ပိုင်းအတွင်း လျှပ်စစ်လက်သီး ပိုင်ရှင်ဖြစ်လာပါလိမ့်မည်။ ထို့ထက်ပိုလျှင်မြန်ရန်အတွက်ကတော့ အနည်းဆုံးလေ့ကျင့် ရက်(၁၀၀)တော့ ရှိရမည်။

မှတ်ချက်-၁။   ။လက်တွေ့အသုံးချ လျှပ်စစ်လက်သီးထိုးနည်းစနစ်သည် အခြေခံဗန်းမော်ကွန်ဖူး လက်သီးပျော့ထိုးနည်းစနစ်နှင့်တော့မတူပါ။ တစ်ချို့က ဆရာကြီးဗန်းမော်သိန်းအောင်၏ အခြေခံ လက်သီးပျော့ကစားကွက်ကိုသာ မြင်ဖူးထားပြီး အမြင်ဖြင့်ဆရာကြီး၏ လျှပ်စစ်လက်သီးကို ထိုးတတ်နေပြီဟု ထင်ကြပါသည်။ အခြေခံထိုးကွက်နှင့်အဆင့်မြင့် လျှပ်စစ်လက်သီးထိုးစနစ်တို့မှာ လုံးဝမတူပါ။ အကယ်၍ ဆရာကြီးဗန်းမော်သိန်းအောင်၏ သိုင်းပညာရပ်များကို သင်ချင်ပါက ရန်ကုန်မြို့၊ အလုံမြို့နယ်၊ ဆင်မင်းဈေးတစ်ဝိုက်တွင် ဗန်းမော်ဘွဲ့ခံ ဆရာကြီးများ၊ နာမည်ရှေ့တွင် ဗန်းမော် ဟုဘွဲ့တပ်ထားသော ဆရာကြီးများရှိပါသည်။ ထိုဆရာကြီးများထံတွင် သင်ယူနိုင်ပါသည်။

မှတ်ချက်-၂။  ။ဤလျှပ်စစ်လက်သီးထိုးနည်းကို လက်တွေ့သင်လိုလျှင် ၂၀၁၃၊ မတ်လထုတ် နက္ခတ္တရောင်ခြည်မဂ္ဂဇင်း၊ အမှတ်(၃၂၀) ကိုယူဆောင်၍ အမှတ်(၂၅၂)၊ အောင်ရတနာ(၁၇)လမ်း၊ (၁၆)ရပ်ကွက်၊ မြောက်ဒဂုံမြို့နယ်၊ ရန်ကုန်မြို့တွင် အခကြေးငွေပေးစရာမလိုပဲ ဤလျှပ်စစ်လက်သီး ထိုးနည်းကို နက္ခတ္တရောင်ခြည်မဂ္ဂဇင်းတွင် ရေးသားသူ ဆရာကြီးမင်းယက္ခထံတွင် အထက်ဖော်ပြပါ စာအုပ်ကိုယူဆောင်သွား၍ သင်ယူနိုင်ပါသည်ဟု ဆရာကြီးမှ ရေးသားဖော်ပြခဲ့ပါသည်။ ဖုန်းကြိုဆက်ရန်နှင့် ရုံးချိန်အတွင်းသာ လာရောက်ရန်လည်း ဖော်ပြထားပါသည်။ ဖုန်းနံပါတ်မှာ ၀၉၇၃၀၁၄၅၉၂ ဖြစ်ပါသည်။

ယခု လျှပ်စစ်လက်သီးထိုးနည်း မှာ ဆရာမင်းယက္ခ၏ဘဝအတွေ့အကြုံများ ဆောင်းပါး မှ ကောက်နုတ်၍ ဖော်ပြလိုက်ခြင်း ဖြစ်ပါတယ်ခင်ဗျာ။ လျှပ်တစ်ပြက်အတွင်း တစ်ဖက်ရန်သူကို အငိုက်မိလဲကျသွားစေနိုင်သည့် လက်သီးထိုးနည်းလည်းဖြစ်ပါတယ်။ ဒါကြောင့်မိတ်ဆွေ များ လေ့လာ၊ လေ့ကျင့်နိုင်ရန်အတွက် လေ့လာမှတ်သားထားသည့် လက်သီးထိုးနည်းစနစ်များထဲမှ ထုတ်နှုတ်၍ ဖော်ပြလိုက်ပါတယ်ခင်ဗျာ။

ဆောင်းပါးကို ebook အနေနဲ့ လိုချင်ရင်တော့ ဒီနေရာမှာ Download ယူနိုင်ပါတယ်ခင်ဗျာ။

ရွှင်လန်းချမ်းမြေ့ကြပါစေ။